Internews Орталық Азияның MediaCAMP бағдарламасы аясында 2021-2022 жылдары отандық контент өндірісін қолдауды жалғастырады.
Кәсіби медиаға ұлттық және орыс тілдерінде түрлі платформаларға, контент өндірісінің инновациялық әдіс-тәсіл қолданып әрі аудиторияны тарта отырып түрлі форматта жоба жасауына қаржылай қолдау көрсетеміз.
Жеңімпаздарды анықтау үшін әдеттегідей байқаулар жарияланады:
«Ірі грант» — ұзақмерзімді мәнге ие, ауқымды аудиториясы бар ірі жобаларға арналған. Жобалардың ұзақтығы — 8 айға дейін. Байқау 2021 жылғы қазанда жарияланады.
«Шағын грант» — қысқа мерзімде жүзеге асатын инновациялық жобаларды қолдау. Жобалардың ұзақтығы — 1 айдан 6 айға дейін. Байқау 2022 жылғы қаңтарда жарияланады.
Назар аударыңыз! Былтырғыдан айырмашылық — биыл «Шағын грант» байқауы бір рет өткізіледі.
ЖАҢА байқау!
«DOC форматына гранттар» — деректі фильмдер өндірісін қолдау. Жобалардың ұзақтығы — 6 айдан 11 айға дейін. Байқау 2022 жылдың басында өтеді.
Назар аударыңыз! Деректі фильмдер өндірісін қолдау байқауына сценарий жазу, кейіпкер іздеу, вижуал стилін таңдау сияқты алдын ала дайындық жұмыстары біткен жобалар қатыса алады. Түсірілетін фильмнің тизері болса, құба-құп.
Бұл байқауларға Қазақстан, Тәжікстан мен Өзбекстандағы мемлекеттік емес медиа: онлайн-басылымдар, телекомпаниялар, радиостанциялар, продакшен-студиялар немесе тәуелсіз авторлар (журналистер, блогерлер) қатыса алады.
Шарттары, контент түрі, бюджеті, мерзімі туралы егжей-тегжейлі ақпаратты әрбір байқау жарияланған кезде хабарландыруынан білесіз.
Newreporter.org, Internews.kz, Media.tj сайттары мен әлеуметтік желі парақшаларымыздағы хабарландыруларды қарай жүріңіз.
Қандай да бір нақтылайтын сұрағыңыз болса, Central-Asia-Applications@internews.org эл. поштасына жазыңыз. Хат тақырыбына «Ірі грант» байқауы бойынша сұрақ» деп көрсетсеңіз болады.
Орталық Азиядағы Internews өкілдігі отандық контент өндірісіне үш жылдан бері қолдау көрсетіп келеді. Осы кезде медиа, редакциялар, блогерлер, тәуелсіз журналистер 173 жоба жасады. Бұл дегеніңіз — 4000-нан астам материал (мақалалар, лонгридтер, подкасттар, уеб-сериалдар, деректі фильмдер және т. б.). Ал материалдардың жалпы қаралым, көрілім, тыңдалым, оқылым саны 40 миллионнан асты.
Жоба АҚШ Халықаралық даму агенттігінің (USAID) қолдауымен Орталық Азияның MediaCAMP бағдарламасы аясында жүзеге асады.
